Nafas Ambalvi
sar-barahna bhari barsat men ghar se nikle
ham bhi kis gardish-e-halat men ghar se nikle
din men kis kis ko bata.enge masafat ka sabab
bas yahi soch ke ham raat men ghar se nikle
sar pe ḳhud apni salibon ko uTha.e ham log
ruuh ka bojh liye zaat men ghar se nikle
kab baras jaa.en in ankhon ka bharosa hi nahin
kaun be-vaqt ki barsat men ghar se nikle
Dar gaya dekh ke main shahr-e-muhazzab ka chalan
kitne aaseb fasadat men ghar se nikle
ain mumkin hai ki vo din men numayan hi na ho
us sitare se kaho raat men ghar se nikle
un ki fitrat men taghaful bhi murkkab tha ‘nafas’
ham hi nadan the jo jazbat men ghar se nikle
Leave a Reply