asrarul-haq-majaz

Saqi

miri masti men bhi ab hosh hi ka taur hai saaqi

tire saghar men ye sahba nahin kuchh aur hai saaqi

bhadakti ja rahi hai dam-ba-dam ik aag si dil men

ye kaise jaam hain saaqi ye kaisa daur hai saaqi

vo shai de jis se niind aa jaae aql-e-fitna-parvar ko

ki dil azurda-e-tamiz-e-lutf-o-jaur hai saaqi

kahin ik rind aur vamanda-e-afkar tanhai

kahin mahfil ki mahfil taur se be-taur hai saaqi

javani aur yuun ghir jaae tufan-e-havadis men

khuda rakkhe abhi to be-khudi ka daur hai saaqi

chhalakti hai jo tere jaam se us mai ka kya kahna

tire shadab honton ki magar kuchh aur hai saaqi

mujhe piine de piine de ki tere jam-e-lalin men

abhi kuchh aur hai kuchh aur hai kuchh aur hai saaqi

More Poems

Leave a Comment