Rashid Shahjahanpuri
saqi-e-rangin-ada tha bada-e-gulfam tha
naseh-e-mushfiq lihaz-e-tauba mushkil kaam tha
jo tajalli-ashna tha jalva-gah-e-am men
vo nigahen thiin hamari ya dil-e-nakam tha
mera afsana sunaya qais ne farhad ne
ab bhi main badnam huun pahle bhi main badnam tha
un ki mahfil men faqat main hi na tha hasrat-zada
sham.a bhi afsurda thi parvana bhi nakam tha
kya suna.un aap ko afsana-e-rah-e-vafa
muḳhtasar ye hai ki main nakam huun nakam tha
ab hamen vo din vo raten yaad aati hain ‘rashid’
ku-e-janan ki baharen thiin dil-e-ḳhush-kam tha
Leave a Reply