Majid Ul Baqri
sapne ki vaadi ko taj kar rup-nagar men aaya kar
din ke phaile kaghaz par apni tasvir banaya kar
dhuup kaḌi hai nanga sar hi sahraon se guzrunga
apne dupaTTe ke pallu ka mere sar par saaya kar
ek samundar ki maujon ko ek bhanvar men rahne de
niili ankhon ke sagar ko aise mat chhalkaya kar
honT ki surḳhi jhank uThti hai shishe ke paimanon se
miTTi ke bartan men paani pi kar pyaas bujhaya kar
dil ki avazon ka gumbad abadi men phahTta hai
duur kisi ḳhamosh kuen men munh laTka kar gaaya kar
biis baras se ik taare par man ki jot jagata huun
divali ki raat ko tu bhi koi diya jalaya kar
‘majid’ ne bairag liya hai koi aisi baat nahin
idhar udhar ki baten kar ke logon ko samjhaya kar
Leave a Reply