Sultan Akhtar
saans ukhḌi hui sukhe hue lab kuchh bhi nahin
pyaas ka naam hi raushan hai bas ab kuchh bhi nahin
sub.h tak phir bhi nahin bujhte hain ankhon ke charagh
janta huun ki pas-e-parda-e-shab kuchh bhi nahin
sar-e-ehsas pe dastar-e-fazilat na rahi
bas ki ab silsila-e-nam-o-nasab kuchh bhi nahin
gul-e-imkan na sarsabz koi barg-e-umid
ya.ani ab ke to sar-e-shaḳh-e-talab kuchh bhi nahin
be-ta.alluq rahe barson to koi baat bhi thi
in dinon tum se na milne ka sabab kuchh bhi nahin
vaz.a-dari hi bikharne nahin deti ‘aḳhtar’
varna ham TuuTe hue logon men ab kuchh bhi nahin
Leave a Reply