Sang-E-Jafa Ka Gham Nahin Dast-E-Talab Ka Dar Nahin

Nazm Tabatabai

sang-e-jafa ka gham nahin dast-e-talab ka Dar nahin

apna hai us par ashiyan naḳhl jo barvar nahin

sunte ho ahl-e-qafila main koi rahbar nahin

dekh raha huun tum men se ek bhi raah par nahin

maut ka ghar hai asman is se kahin mafar nahin

niklen to koi dar nahin bhagen to rahguzar nahin

pahle jigar par aah ka naam na tha nishan na tha

aḳhir-e-kar ye hua aah to hai jigar nahin

sub.h-e-azal se ta-abad qissa na hoga ye tamam

jaur-e-falak ki dastan aisi bhi muḳhtasar nahin

barg-e-ḳhizan-rasida huun chheḌ na mujh ko ai nasim

zauq fughan ka hai mujhe shikva-e-abr-e-tar nahin

munkir-e-hashr hai kidhar dekhe tu aankh khol kar

hashr ki jo ḳhabar na de aisi koi sahar nahin

shabnam o gul ko dekh kar vajd na aa.e kis tarah

ḳhanda be-sabab nahin girya be-asar nahin

tere faqir ka ghurur tajvaron se hai siva

tarf-e-kulah men de shikan us ko ye dard-e-sar nahin

koshak o qasr o bam-o-dar tu ne bina kiye to kya

haif hai ḳhanuman-ḳharab dil men kisi ke gher nahin

nala-kashi raqib se meri tarah muhal hai

dil nahin hausla nahin zohra nahin jigar nahin

shatir-e-pir-e-asman vah-ri teri dastburd

ḳhusrav o kaiqibad ki tegh nahin kamar nahin

shaan karim ki ye hai haan se ho peshtar ata

lutf ata ka kya ho jab haan se ho peshtar nahin

laakh vo be-ruḳhi kare laakh vo kaj-ravi kare

kuchh to malal is ka ho dil ko mire magar nahin

sun ke bura na maniye sach ko na jhuuT janiye

zikr hai kuchh gila nahin baat hai neshtar nahin