sang-e-dar dekh ke sar yaad aaya
koi divana magar yaad aaya
phir vo andaz-e-nazar yaad aaya
chak-e-dil ta-ba jigar yaad aaya
zauq-e-arbab-e-nazar yaad aaya
sajda be-minnat-e-sar yaad aaya
har tabassum pe ye khata huun fareb
ki unhen dida-e-tar yaad aaya
phir tira naqsh-e-qadam hai darkar
sajda-e-rahguzar yaad aaya
jama karta huun ghubar-e-rah-e-dost
sar-e-shorida magar yaad aaya
haa.e vo marka-e-navak-e-naz
dil bachaya to jigar yaad aaya
a.ina ab nahin dekha jaata
main ba-unvan-e-digar yaad aaya
dard ko phir hai mire dil ki talash
ḳhana-barbad ko ghar yaad aaya
us ko bhule to hue ho ‘fani’
kya karoge vo agar yaad aaya
Leave a Reply