Kya Aasman Se Rabt-E-Yaqin Mahw-E-KHwab Hai

Aurang Zeb

kya asman se rabt-e-yaqin mahv-e-ḳhvab hai

soi hui hai ḳhak-e-zamin mahv-e-ḳhvab hai

hai niind men ita.at-o-irfan ka silsila

sajdon ke saath saath jabin mahv-e-ḳhvab hai

so.e hue to so.e hain dekho magar yahan

jo jagta hai vo bhi kahin mahv-e-ḳhvab hai

ye shahr gahri niind men jaata nahin kabhi

har shaḳhs apne apne ta.iin mahv-e-ḳhvab hai

ik ik sitara niind ki haibat men hai sharik

vo raat hai ki mah-e-mubin mahv-e-ḳhvab hai

ankhon se uTh raha hai dhuan aur dhuen se dukh

jalte hue makan men makin mahv-e-ḳhvab hai

parkar chal rahi hai kahin gahri niind men

ai ‘zeb’ mera hashiya-bin mahv-e-ḳhvab hai