sanbhal ai miri miTTi badal na ja.un kahin
mujhe rula de ki patthar men Dhal na ja.un kahin
kaman-e-jan men huun ik aḳhiri nafas ka tiir
main dastaras se bhi apni nikal na ja.un kahin
sameT le mire mahtab mujh ko siine men
jhulas rahi hai koi shai main jal na ja.un kahin
vafa ke naam pe de jo fareb de mujh ko
tabah hone se pahle sanbhal na ja.un kahin
gharib-e-shahr-e-suḳhan apni qadr-o-qimat kya
bahut hai bhiiḌ ‘mujibi’ kuchal na ja.un kahin
Leave a Reply