Samne Tere Hun Ghabraya Hua

sāmne tere huuñ ghabrāyā huā

be-zabāñ hone par sharmāyā huā

laakh ab manzar ho dhundlāyā huā

yaad hai mujh ko nazar aayā huā

ye bhī kahnā thā batā kar rāsta

maiñ vahī huuñ terā bhaTkāyā huā

maiñ ki ik aaseb ik be-chain ruuh

be-vuzū hāthoñ kā dafnāyā huā

aa gayā phir mashvara dene mujhe

ḳhema-e-dushman kā samjhāyā huā

phir vo manzil lutf kyā detī mujhe

maiñ vahāñ pahuñchā thā jhunjhlāyā huā

terī galiyoñ se guzar āsāñ nahīñ

aaj bhī chaltā huuñ ghabrāyā huā

kuchh nayā karne kā phir matlab hī kyā

jab tamāshā.ī hai uktāyā huā

kam se kam is kā to rakhtā vo lihāz

maiñ huuñ ik āvāz par aayā huā

mujh ko āsānī se pā saktā hai kaun

maiñ huuñ tere dar kā Thukrāyā huā

Leave a Comment