Poet
samajh ke rasta idhar se guzarne valon ne
kahin ka chhoḌa na dil se utarne valon ne
bane-bana.e hue raston pe chalte hue
ḳhuda bana.e ḳhuda.i se Darne valon ne
hazar chhed kiye jholiyon men apnon ki
tumhare naam pe ḳhairat karne valon ne
tavil umr ki Dheron dua.en bheji hain
mire charagh ko paani se bharne valon ne
hamari aankh men ik buund bhi nahin chhoḌi
misal-e-abr falak par ubharne valon ne
ye kis tarah ke ajab vahimon men Daal diya
sharab o shahd ki tasdiq karne valon ne
zaban-bandi pe majbur ho ga.i duniya
vo khel khela hai hairat se marne valon ne
charagh-e-rah ko gharat-gari sikha.i hai
hava-e-shahr pe ilzam dharne valon ne
Leave a Reply