Daniyal Tareer
sakit ho magar sab ko ravani nazar aa.e
us ret ke sadqe ki jo paani nazar aa.e
main sabz parinde ki tarah shahr se ja.un
peḌon ko miri naql-e-makani nazar aa.e
talab mire ḳhvab ke paani se bhara ho
aur us men paḌa chand kahani nazar aa.e
ye aankh ye lau kitne zaman dekh chuki hai
jis chiiz ko dekhun vo purani nazar aa.e
kya kya na main mashkiza-e-alfaz men bhar luun
ik baar agar mauj-e-ma.ani nazar aa.e
Leave a Reply