Sahraon Ki Pyas Bujhane

sahrāoñ kī pyaas bujhāne

kab aa.e barsāt na jaane

mujh ko merī yaad dilāne

aa.e haiñ kuchh dost purāne

jaane ghar kis kis ke jaleñge

nikle haiñ vo jashn manāne

ḳhvāboñ kī vaadī meñ mile haiñ

biite lamhe guzre zamāne

vaqt ke TuuTe ā.īne meñ

chehre haiñ sab jaane pahchāne

tum se mile to yaad aayā hai

dekhe the kuchh ḳhvāb suhāne

raat kī bāñhoñ meñ khulte haiñ

terī yādoñ ke maiḳhāne

ummīdeñ ghar chhoḌ chukī thiiñ

kab aa.e haiñ hosh Thikāne

dasht kī jaltī ret pe ‘ḳhusrav’

vaqt likhegā apne fasāne

Leave a Comment