sahra se vapas aa.e hain Duube hain pyaas men
bhar do samundaron ko hamare gilas men
dil men ḳhayal-e-ḳhak-e-tamanna liye hue
leTa hua hai kaun ye maile libas men
maujon ka lahja dekh ke mahsus ye hua
dariya nahin hai aaj to hosh-o-havas men
apne hasin ḳhvab ki ta.amir ke liye
becha hai ḳhud ko main ne mahajan ke paas men
‘anvar’ mata-e-dard ki tarikiyan liye
aaya hai kitni duur ujalon ki aas men
Leave a Reply