Munawwar Rana
sahra pe bura vaqt mire yaar pada hai
divana kai roz se bimar pada hai
sab raunaq-e-sahra thi isi pagle ke dam se
ujda hua divane ka darbar pada hai
ankhon se tapakti hai vahi vahshat-e-sahra
kandhe bhi batate hain bada baar pada hai
dil men jo lahu-jhil thi vo suukh chuki hai
ankhon ka do-aba hai so be-kar pada hai
tum kahte the din ho gae dekha nahin us ko
lo dekh lo ye aaj ka akhbar pada hai
odhe hue ummid ki ik maili si chadar
darvaza-e-bakhshish pe gunahgar pada hai
ai khak-e-vatan tujh se main sharminda bahut huun
mahngai ke mausam men ye tyauhar pada hai
Leave a Reply