Ishrat Qadri
sahme se the parind basera udaas tha
jangal ki tarah shahr men ḳhauf-o-hiras tha
donon hi ajnabi the magar TuuT kar mile
main dard-ashna vo sitara-shanas tha
kis tamkanat se anjuman arasta kiye
tanha.iyon men koi mire as-pas tha
ankhon se meri sub.h tak aansu na tham sake
kal raat vo mila to bahut hi udaas tha
apni to intishar men guzri tamam umr
vo koi aur hain jinhen mahaul raas tha
us ne kuchh is ada se pazira.i ki miri
tahzib-e-husn par main sarapa sipas tha
samt-e-safar badal dega vo agle moḌ par
‘ishrat’ mujhe guman tha na koi qayas tha
Leave a Reply