Poet
sahar-o-sham men tanzim kahan hoti hai
ḳhvahish-e-sub.h ki tajsim kahan hoti hai
luuT le jaata hai bas chalta hai jis ka jitna
raushni shahr men taqsim kahan hoti hai
un mohallon men jahan ham ne guzari hai hayat
madrase hote hain ta.alim kahan hoti hai
shahryaron ne ujaḌa ho jise hathon se
phir se abad vo aqlim kahan hoti hai
tairte hain jo ghulamon ki jhuki ankhon men
un savalat ki tafhim kahan hoti hai
jis ka e.azaz tire dar ki gada.i ho use
umr-bhar ḳhu-e-zar-o-sim kahan hoti hai
ham gharibon ki jabin par kisi jabir ke huzur
tohmat-e-sajda-e-taslim kahan hoti hai
Leave a Reply