Saf Kahte Ho Magar Kuchh Nahin Khulta Kahna

saaf kahte ho magar kuchh nahin khulta kahna

baat kahna bhi tumhara hai muamma kahna

ro ke us shoḳh se qasid mira rona kahna

hans pade us pe to phir harf-e-tamanna kahna

masal-e-maktub na kahne men hai kya kya kahna

na miri tarz-e-ḳhamoshi na kisi ka kahna

aur thodi si shab-e-vasl badha de ya-rab

sub.h nazdik hamen un se hai kya kya kahna

phaad khata hai jo ghairon ko jhapat kar sag-e-yar

main ye kahta huun mire sher tira kya kahna

har bun-e-mu-e-mizha men hain yahan sau tufan

ain ghaflat hai mari aankh ko dariya kahna

vasf-e-ruḳh men jo sune sher vo hans kar bole

sher hain nuur ke hai nuur ka tera kahna

la sakoge na zara jalva-e-didar ki taab

arini munh se na ai hazrat-e-musa kahna

kar liya ahd kabhi kuchh na kahenge munh se

ab agar sach bhi kahen tum hamen jhuta kahna

ḳhaak men zid se milao na mire aansu ko

sachche moti ko munasib nahin jhuta kahna

kaise nadan hain jo achchhon ko bura kahte hain

ho bura bhi to use chahiye achchha kahna

dam-e-aḳhir tu buto yaad ḳhuda karne do

zindagi bhar to kiya main ne tumhara kahna

padhte hain dekh ke us but ko farishte bhi darud

marhaba salle-ala salle-ala kya kahna

ai buto tum jo ada aa ke karo masjid men

lab-e-mehrab kahe nam-e-ḳhuda kya kahna

in hasinon ki jo tarif karo chidhte hain

sach to ye hai ki bura hai unhen achchha kahna

shauq kaabe liye jaata hai havas janib-e-dair

mere allah baja la.un men kis ka kahna

saari mahfil ko isharon men luta do ai jaan

siikh lo chashm-e-suḳhan-go se latifa kahna

ghatte ghatte men raha ishq-e-kamar men aadha

jama-e-tan ko mire chahiye niima kahna

men to ankhon se baja laata huun irshad-e-huzur

aap sunte nahin kanon se bhi mera kahna

chusti-e-taba se ustad ka hai qaul ‘amir’

ho zamin sust magar chahiye achchha kahna

Leave a Comment