saa.e ne saa.e ko sada di
ret ki har divar gira di
is ghar men rakkha hi kya tha
main ne ghar men aag laga di
niind tumhen aati hi kab thi
yaad ne kis ki niind uḌa di
guzre the ḳhamosh gali se
vo jaane ab jis ne sada di
ek zara si baat thi jis ki
dil ne saari umr saza di
main apne gham men Duuba tha
tum ne kyuun avaz suna di
ik saa.e ki yaad men pyare
nahaq saari umr ganva di
hu ke aalam men bole ho
saari faza ik guunj bana di
jab sagar apne par aaya
sahil ki har chiiz baha di
ishq ajab ziddi bachcha hai
sar phoḌa aur ḳhaak uḌa di
ishq hamari miTTi men tha
surat kyuun patthar ki bana di
Leave a Reply