Raz Chandpuri
sach to ye hai ki dida-var ho tum
be-ḳhabar ham hain ba-ḳhabar ho tum
vaqif-e-raz-e-ḳhair-o-shar ho tum
ḳhush-ḳhayal aur ḳhush-nazar ho tum
ashna-e-rumuz-e-kun-fa-yakun
raz-e-hasti se ba-ḳhabar ho tum
jis se raushan hai matl.a-e-ummid
sham-e-ghurbat men vo sahar ho tum
kaun hai ye harif-e-sho.ala-e-tur
ai main qurban jalva-gar ho tum
dasht-e-ghurbat men rah-e-hasti men
main samajhta huun ham-safar ho tum
ek nisbat hai nisbat-e-mauhum
be-nava main huun tajvar ho tum
‘raz’ do aib hain yahi tum men
saf-go aur haq-nigar ho tum
Leave a Reply