sabz shaḳhon pe zamane ki nazar hoti hai
kis ko sukhe hue patton ki ḳhabar hoti hai
sadaf-e-chashm se bahar jo na aane paa.e
buund ashkon ki vahi misl-e-guhar hoti hai
yaad ghurbat men jab aati hai vatan ki mujh ko
na-gahan aankh miri ashkon se tar hoti hai
daf.atan dil ka har ik zaḳhm ubhar jaata hai
jab bhi tasvir tiri pesh-e-nazar hoti hai
shaam hote hi sulag jaate hain har ghar men charagh
Duub jaate hain sitare to sahar hoti hai
phuul to phuul hain patte nahin ugte jin men
aise peḌon se bhi umid-e-samar hoti hai
aib-jui men shab-o-roz guzaren jo ‘asar’
apne kirdar pe kab un ki nazar hoti hai
Leave a Reply