sabr-o-qarar TuuT gaya iztirab se
phir raaz khul gaya miri ankhon ke aab se
us dil ke saaz par kisi birhan ka giit hai
aane lagi hain siskiyan dil ke rabab se
jaane se pahle us ne mujhe devta kaha
main umr bhar na chhuT saka is ḳhitab se
phir yaad aa ga.e vahi collage ke din mujhe
sukhe gulab nikle purani kitab se
barbadiyon men meri kahan kis ka haath hai
tum ḳhud hi puchh lo dil-e-ḳhana-ḳharab se
jin ko guman tha kahin koi ḳhuda nahin
qaumen na bach sakin vo ḳhuda ke azaab se
kafur pal men hoti hai din bhar ki sab thakan
jab dekhta huun bachchon ke chehre gulab se
rakhiye bahut ḳhayal huquq-ul-ibad ka
dena paḌega haq vahan sab ka hisab se
‘shayan’ tujh ko aarzu jannat ki hai agar
dil ko laga le apne ḳhuda ki kitab se
Leave a Reply