Sabab Kya Hai Kabhi Samjhi Nahin Main

sabab kya hai kabhi samjhi nahin main

ki tuuti to bahut bikhri nahin main

rakhi hai guftugu us se har ik pal

sukhan jis se kabhi rakhti nahin main

ye chot apne hi hathon se lagi hai

kisi ke vaar se zakhmi nahin main

karun kyuun yaad tere khal-o-khad ab

shikasta aaine chunti nahin main

ajab thi rahguzar bhi ham-rahi ki

qadam rakh kar kabhi palti nahin main

jo pahunchi sahilon par tab khula hai

ki ab vo tishnagi rakhti nahin main