saba men mast-khirami gulon men bu na rahe
tira khayal agar dil ke ru-ba-ru na rahe
tire baghair har ik aarzu adhuri hai
jo tu mile to mujhe koi aarzu na rahe
hai justuju men tiri ik jahan ka dard-o-nishat
to kya ajab ki koi aur justuju na rahe
tiri talab se ibarat hai soz-o-hayat
ho sard atish-e-hasti jo dil men tu na rahe
tu zauq-e-kam-talabi hai to aarzu ka shabab
hai yuun ki tu rahe aur koi justuju na rahe
kitab-e-umr ka har baab be-maza ho jaae
jo dard main na rahun aur daagh tu na rahe
khuda kare na vo uftad aa pade ham par
ki jan-o-dil rahen aur teri aarzu na rahe
tire khayal ki mai dil men yuun utari hai
kabhi sharab se khali mira subu na rahe
vo dasht-e-dard sahi tum se vasta to rahe
rahe ye saya-e-gesu-e-mushk-bu na rahe
karo hamare hi daghon se raushni tum bhi
bada hai dard ka rishta dui ki bu na rahe
nahin qarar ki lazzat se ashna ye vajud
vo khaak meri nahin hai jo ku-ba-ku na rahe
is iltihab men kaise ghazal-sara ho koi
ki saz-e-dil na rahe khu-e-naghma-ju na rahe
safar tavil hai is umr-e-shoala-saman ka
vo kya kare jise jiine ki aarzu na rahe
Leave a Reply