sab sharik-e-sadma-o-azar kuchh yunhi se hain
yaar kuchh yunhi se hain gham-ḳhvar kuchh yunhi se hain
un ke sab afa.al sab atvar kuchh yunhi se hain
qaul kuchh yunhi se hain iqrar kuchh yunhi se hain
apne divane se mil liije usi men ḳhair hai
aap abhi rusva sar-e-bazar kuchh yunhi se hain
jis jagah dekho nasihat ke liye maujud hain
hazrat-e-naseh ḳhuda.i-ḳhvar kuchh yunhi se hain
dast-e-vahshat ne gareban ka safaya kar diya
jeb ke parde men thoḌe taar kuchh yunhi se hain
un ke aane ki ḳhabar sun kar uḌa di hai ḳhabar
varna ‘muztar’ vaqa.i bimar kuchh yunhi se hain
Leave a Reply