Shuja Khaavar
ruḳh hava ka ye ki jaise us ko asani paḌe
dil ki aag aisi ki ham ko roz sulgani paḌe
nuur ho andar to bahar maat kyuun khani paḌe
vo tajalli kya miyan jo tuur se laani paḌe
zindagi ki qadr tab tum par khulegi dosto
us ke kuche se jab ek ik saans mangvani paḌe
ek to mushkil ko jhelun aur uupar se ye hai
apni mushkil roz us ko ja ke samjhani paḌe
ḳhud vo milne aa.e to haa.el rahe ye be-ḳhudi
main jo milne ja.un to raste men hairani paḌe
paḌ gaya jab tu hi in-o-an ki uljhan men ‘shuja.a’
laakh phir sajde men shab bhar teri peshani paḌe
Leave a Reply