Ameen Rahat Chugtai
roz jo marta hai is ko aadmi likkho kabhi
tirgi ke baab men bhi raushni likkho kabhi
saans lena bhi muqaddar men nahin jis ahd men
baiTh kar us ahd ki bhi an-kahi likkho kabhi
dard-e-dil dard-e-jigar ki dastan likkhi bahut
nan-e-ḳhushk-o-ab-e-kam ko zindagi likkho kabhi
maslahat par bhi kabhi hote rahe qurban usuul
in usulon ko bhi un ki dil-lagi likkho kabhi
gar sameTe ja rahe ho kaam jo karne ke the
us ko ‘rahat’ sa.aton ki agahi likkho kabhi
Leave a Reply