rone se jo bhadas thi dil ki nikal gai
aansu bahae chaar tabiat sambhal gai
main ne taras taras ke guzari hai saari umr
meri na hogi jaan jo hasrat nikal gai
bechain huun main jab se nahin dil-lagi kahin
vo dard kya gaya ki mire dil ki kal gai
kahta hai charagar ki na paega indimal
achchha hua ki zakhm ki surat badal gai
ai shama ham se soz-e-mohabbat ke zabt siikh
kam-bakht ek raat men saari pighal gai
shakh-e-nihal-e-umr hamari na phal saki
ye to hai vo kali jo nikalte hi jal gai
dekha jo us ne pyaar se aghyar ki taraf
‘shair’ qasam khuda ki miri jaan jal gai
Leave a Reply