rivayat-e-dar-o-rasan chhoḌ aa.e
ham ik ishq ka bankpan chhoḌ aa.e
jo ḳhauf-e-ḳhizan se chaman chhoḌ aa.e
iradon ki apne thakan chhoḌ aa.e
jahan moḌ aaya hai dushvariyon ka
aza.em ko himmat-shikan chhoḌ aa.e
vo mahfil men yuun aaj jalva-fagan hai
koi chand jaise gagan chhoḌ aa.e
jahan se chale hain tiri justuju men
vahan ik vafa ka chalan chhoḌ aa.e
hamen bevafa.i ka yuun gham nahin hai
ham ik un ke dil men chubhan chhoḌ aa.e
jahan Thes pahunchi hamari ana ko
zamin kya hai ‘raje’ gagan chhoḌ aa.e
Leave a Reply