Rawish-E-Sada-Bayani Meri

ravish-e-sada-bayani meri

hai ye tegh-e-safhani meri

na-shanasa ko na aae bavar

dastan us ki zabani meri

meri hasti hai mumayyaz ba-adam

be-nishani hai nishani meri

rakhna-gar hai miri azadi men

havas-e-bal fishani meri

sabaq-e-jahl ki takrar pe ab

munhasir hai hama-dani meri

dosti vaza-e-tan-asani ki

ban gai dushman-e-jani meri

khatma hai miri tamhid men darj

hai dil-avez kahani meri

ziraki dam-e-fareb-e-dil hai

hai tahayyur nigarani meri

dil ho saaqi lab-e-dariya saghar

sahl hai pyaas bujhani meri

subh-e-tifli hai budhapa mera

sham-e-piri thi javani meri

ek chakkar hai ba-shakl-e-gardab

band-barpa hai ravani meri

vajh baaqi mire maani ko samajh

surat albatta hai faani meri

bazm-e-kasrat ka tamashai huun

vahdat-e-sarf hai baani meri

Leave a Comment