Zafar Gorakhpuri
raushni parchha.in paikar aḳhiri
dekh luun ji bhar ke manzar aḳhiri
main hava ke jhakkaḌon ke darmiyan
aur tan par ek chadar aḳhiri
zarb ik Thahre hue paani pe aur
jaate jaate phenk kankar aḳhiri
donon mujrim aa.ine ke samne
pahla patthar ho ki patthar aḳhiri
TuTti ik din lahu ki ḳhamushi
dekh lete ham bhi mahshar aḳhiri
ye bhi TuuTa to kahan ja.enge ham
ik tasavvur hi to hai ghar aḳhiri
dil musalsal zaḳhm chahe hai ‘zafar’
aur us ke paas patthar aḳhiri
Leave a Reply