P P Srivastava Rind
raushni bhar ḳhala pe baar the ham
dhund manzar pas-e-ghubar the ham
dhuup men aa.e to sukun mila
chhanv men the to daghdar the ham
koi dastak na koi aahaT thi
muddaton vahm ke shikar the ham
but-gari men hunar bhi shamil tha
sang-sazi se hoshiyar the ham
qarz koi bhi jism o jaan pe na tha
zindagi par magar udhar the ham
zulmaten to charag-e-ḳhema thiin
ḳhalvaton ke gunahgar the ham
fikr o ma.ani talazme tashbih
ai ghazal tere jan-nisar the ham
‘rind’ tha bekasi ka lutf ajiib
ghar men rah kar bhi be-dayar the ham
Leave a Reply