raushan sukut sab usi sho.ala-bayan se hai
is ḳhamushi men dil ki tavaqqo zaban se hai
ḳhashak hain vo barg jo TuuTe shajar se hon
ham se musafiron ka bharam karvan se hai
ehsas-e-gumrahi se masafat hai ji ka rog
ab ke thakan mujhe safar-e-ra.egan se hai
ya aa ke ruk ga.i hai ḳhat-e-tirgi pe aankh
hai raushni to TuuTi hui darmiyan se hai
jab tak lahu safar men hai main raste men huun
kashti hava ke saath khule badban se hai
hai har barahnagi ka labada par-e-badan
is ḳhak-dan ka husn zaman-o-makan se hai
sahra-e-be-kanar hi toḌe hava ka zor
ḳhvahish ko ḳhaar ab ke dil-e-saḳht-jan se hai
har-chand main bhi naqsh-gar-e-ahd-e-hal huun
tasvir ḳhak-e-rahguzar-e-raftagan se hai
Leave a Reply