rasa.i sa.i-e-na-mashkur ho jaa.e to kya hoga
qadam rakhte hi manzil duur ho jaa.e to kya hoga
tajalli ḳhud hijab-e-nur ho jaa.e to kya hoga
ba-zahir bhi koi mastur ho jaa.e to kya hoga
haqiqat men koi mahjur ho jaa.e to kya hoga
nazar se duur dil se duur ho jaa.e to kya hoga
abhi to aarzi hai dost ban kar dushmani karna
jo duniya ka yahi dastur ho jaa.e to kya hoga
ye sab se chhup ke ḳhud ko aa.ine men dekhne vaale
nazar ḳhalvat men barq-e-tur ho jaa.e to kya hoga
liye jaata hai azm-e-tark-e-ulfat un ki mahfil men
nazar uThte hi dil majbur ho jaa.e to kya
nizam-e-ashiqi qaa.em hai un ki be-niyazi se
kisi ki iltija manzur ho jaa.e to kya hoga
har ik ko ‘kaif’ tum kyon apna afsana sunate ho
gham-e-ulfat gham-e-jamhur ho jaa.e to kya hoga
Leave a Reply