raqs karta huun jaam piita huun
aam milti hai aam piita huun
jhuut main ne kabhi nahin bola
zahidan-e-kiram piita huun
rukh hai pur-nur to taajjub kya
bada-e-lala-fam piita huun
itni tezi bhi kya pilane men
abgine ko thaam piita huun
kaam bhi ik namaz hai meri
khatm karte hi kaam piita huun
tere hathon se kis ko milti hai?
mere mah-e-tamam piita huun
zindagi ka safar hi aisa hai
dam-ba-dam gaam gaam piita huun
mujh ko mai se badi mohabbat hai
main ba-sad-ehtiram piita huun
mai mire hont chuum leti hai
le ke jab tera naam piita huun
shaikh o mufti ‘adam’ jab aa jaaen
ban ke un ka imaam piita huun
Leave a Reply