ranj par ranj musibat si musibat dekhi
hijr-e-maula men ye aram ki surat dekhi
mahv-e-didar rahe hashr men ashiq tere
aankh uTha kar na kabhi ḳhuld ki surat dekhi
le liya vada-e-baḳhshish bhi duha.i kar ke
shafe-e-hashr ki ummat se mohabbat dekhi
aa ga.i mujh ko nazar ghayat-e-chashm-e-mushtaq
qabr men aa ke mohammad ki jo surat dekhi
azmati hai shab-e-hijr mujhe kya hamdam
main to ḳhush huun ki juda.i ki haqiqat dekhi
jalve ka va.ada qayamat pe kiya tha mauquf
aap ke hijr men sau baar qayamat dekhi
ḳhush-nasibi hai ki main ashraf-e-maḳhluq hua
lillahil-hamd gham-e-ishq ki lazzat dekhi
ḳhar-e-taiba ko gul-e-ḳhuld se baḌh kar samjhe
ham ne in kanTon men vo bu-e-mohabbat dekhi
daur-e-saghar se to pahle hi na tha hosh mujhe
main ne saaqi ki nigahon men karamat dekhi
parda-e-hashr men poshida rakha apna jamal
us ne jab talib-e-didar ki kasrat dekhi
duḳhtar-e-raz ki nigahon se bacha.e allah
aap ne ‘rasiḳh’-e-mai-ḳhvar ki halat dekhi
Leave a Reply