Rashida Maheen Malik
rang ḳhushbu aur gul-o-gulzar ki hai raushni
meri nas nas men tumhare pyaar ki hai raushni
mere honTon par ujale hain lab-e-dildar ke
meri ankhon men nigah-e-yar ki hai raushni
rahat-e-jan ke ujale dekhti huun ja-ba-ja
baagh men qurbat ke barg-o-bar ki hai raushni
teri ḳhushbu is tarah utri hai ruh-o-jism men
meri sanson men tiri mahkar ki hai raushni
ek divar-e-rifaqat jo pas-e-divar hai
meri divaron pe us divar ki hai raushni
ab charaghon ko bujha de ai hava-e-nim-shab
taaq men mere mire dildar ki hai raushni
Leave a Reply