rañg jitne haiñ mirī shām-o-sahar ke
muntazir rahte haiñ us kī ik nazar ke
haal ham se pūchh mat dīvār-o-dar ke
ghar meñ rah kar bhī nahīñ ham apne ghar ke
hausle kuchh past the dīda-e-tar ke
ham ne har ġham rakh liyā tasvīr kar ke
koī to bāzār meñ dūkān hotī
bechtī jo mushkileñ āsān kar ke
ek manzar meñ nihāñ the aur manzar
dekhne vaale ne kab dekhā Thahar ke
aisā to mumkin nahīñ hasrat na hogī
ḳhaar hañs paate nahīñ phūloñ se Dar ke
ab kahāñ pahlā sā rishta hai zamīñ se
maiñ ne bhī nuqsān jhele bāl-o-par ke
us kī niyyat pe mujhe shak ho rahā hai
raushnī vo bāñTtā hai aag kar ke