rang jitne hain miri sham-o-sahar ke
muntazir rahte hain us ki ik nazar ke
haal ham se puchh mat divar-o-dar ke
ghar men rah kar bhi nahin ham apne ghar ke
hausle kuchh past the dida-e-tar ke
ham ne har gham rakh liya tasvir kar ke
koi to bazar men dukan hoti
bechti jo mushkilen asan kar ke
ek manzar men nihan the aur manzar
dekhne vaale ne kab dekha Thahar ke
aisa to mumkin nahin hasrat na hogi
ḳhaar hans paate nahin phulon se Dar ke
ab kahan pahla sa rishta hai zamin se
main ne bhi nuqsan jhele bal-o-par ke
us ki niyyat pe mujhe shak ho raha hai
raushni vo banTta hai aag kar ke
Leave a Reply