Sauda Mohammad Rafi
aadam ka jism jab ki anasir se mil bana
kuchh aag bach rahi thi so ashiq ka dil bana
sargarm-e-nala in dinon main bhi huun andalib
mat ashiyan chaman men mire muttasil bana
jab tesha kohkan ne liya haath tab ye ishq
bola ki apni chhati pe dharne ko sil bana
jis tirgi se rose hai ushshaq ka siyah
shayad usi se chehra-e-khuban pe til bana
lab zindagi men kab mile us lab se ai kalal
saghar hamari khaak ko math karke gil bana
apna hunar dikhavenge ham tujh ko shishagar
tuuta hua kisi ka agar ham se dil bana
sun sun ke arz haal mira yaar ne kaha
‘sauda’ na baten baith ke yaan muttasil bana
Leave a Reply