rakhta nahin hai dasht sarokar aab se
bahla.e jaate hain yahan pyase sarab se
din men bhi ghar ujale se mahrum hai to hai
kirnon ka kya saval karun aftab se
bilkul durust hote hue fail ho gaya
main ne javab naql kiya tha kitab se
vo saal ho ki maah ho din ho ki ho ghaḌi
baaqi nahin bachunga kisi ke hisab se
har shai par ik uchaTti nazar Dalta chalun
be-kar hoga mera utarna rikab se
tarmim hazf aur izafe ke saath saath
ye kulliyat pur hai mire intiḳhab se
Leave a Reply