rakha hai bazm men us ne charagh kar ke mujhe
abhi to sunna hai afsane raat bhar ke mujhe
ye baat to mire ḳhvab-o-ḳhayal men bhi na thi
sata.enge dar-o-divar mere ghar ke mujhe
main chahta tha kisi peḌ ka ghana saaya
dua.en dhuup ne bheji hain sahn bhar ke mujhe
vo mera haath to chhoḌen ki main qadam moḌun
bula rahe hain na.e raste safar ke mujhe
charagh ro.e hai jagmag kiya tha jin ka nasib
vo log bhuul ga.e taqche men dhar ke mujhe
main apne aap men vahshat ka ik tamasha tha
hava.en phuul banati rahin katar ke mujhe
tamam azmaten mashkuk ho ga.iin jaise
vo uthla-pan mila gahra.i men utar ke mujhe
dilon ke beach na divar hai na sarhad hai
dikha.i dete hain sab fasle nazar ke mujhe
Leave a Reply