Aatif Waheed Yasir
rahzanon ke haath saara intizam aaya to kya
phir vafa ke mujrmon men mera naam aaya to kya
mere qatil tujh ko akhir kaun samjhae ye baat
par-shikasta ho ke koi zer-e-dam aaya to kya
phir vo bulvaya gaya hai karbala-e-asr men
kufiyon ko phir se shauq-e-ehtimam aaya to kya
kho chuki saari basirat so chuke ahl-e-kitab
asmanon se koi taaza payam aaya to kya
jab ki un ankhon ki mashal baam par raushan nahin
shahr men yasir koi mah-e-tamam aaya to kya
Leave a Reply