Mahmood Shaam
rahat-e-nazar bhi hai vo azab-e-jan bhi hai
us se rabt-e-lazzat bhi aur imtihan bhi hai
fasle miTe bhi hain aur kuchh baḌhe bhi hain
ye safar zaruri hai aur ra.egan bhi hai
umr-bhar ki uljhan de ek pal ka nazzara
tera gham haqiqat bhi aur be-nishan bhi hai
teri miThi baton men jhiil jhiil ankhon men
aag bhi sulagti hai dard se amaan bhi hai
tai karen to ham kaise fasle dil-o-jan ke
ek ye ana ka pul apne darmiyan bhi hai
laakh main tujhe bhulun laakh tu mujhe bhule
ek rishta-e-benam apne darmiyan bhi hai
ishq-e-dil men tughyani barf barf honTon par
sar-phiri bhi hai chahat aur be-zaban bhi hai
teri zindagi sargarm meri zindagi uljhan
raqs men bhi hai ḳhvahish aur sargiran bhi hai
‘sham’ jaane kyuun ham ne si liya hai honTon ko
varna apne hathon men vaqt ki inaan bhi hai
Leave a Reply