Poet
raah men haq ke azizan aap ko qurban karo
ya nahin us par tasadduq apna jism-o-jan karo
salikan kab lag chaloge rah men haq ke mor chal
ishq ki tezi ko apne chheḌ kar jaulan karo
kaan talak ḳhatir rakhoge aarzu men tang kar
ghuncha-dil bad-e-saba suun ishq ke ḳhandan karo
aql-e-nafsani tuman men burqa-e-haivan hai
phaaḌ kar parda nazar ka aap ko insan karo
ḳhana-e-dil ko rakho abad haq ki yaad suun
ishq ki atish suun tan ko jaal kar viran karo
toḌ kar tan ko karo barik parde ki misal
sham-e-nurani laga fanus-e-tan taban karo
dekhte raho roz-o-shab ankhiyan suun tum rab ka jamal
nain ki thali men is ko jyuun durr-e-ghaltan karo
pherte raho diid ka manka nazar ke taar men
raat din ankhiyan ko apni is taraf gardan karo
Leave a Reply