Rah-E-Kahkashan Se Guzar Gaya Hama-in-O-an Se Guzar Gaya

Poet

rah-e-kahkashan se guzar gaya hama-in-o-an se guzar gaya

koi bazm-e-naz-o-niyaz men main had-o-kaman se guzar gaya

na koi jahan se guzar sake ye vahan vahan se guzar gaya

tire ishq men dil-e-mubtala har ik imtihan se guzar gaya

tire ishq-e-sina-figar ka ye shu.ur qabil-e-dad hai

vahi tiir dil se laga liya jo tiri kaman se guzar gaya

tire husn-e-sajda-navaz ka ye karam jabin-e-niyaz par

ki mile haram hi haram mujhe main jahan jahan se guzar gaya

mire naseha tira shukriya mire haal par mujhe chhoḌ de

jo tiri zamin par muhit hai main us asman se guzar gaya

ye nizam bazm-e-hayat ka abhi ḳhalfashar ki nazr tha

vo to shukr hai ki fasana-ḳhvan miri dastan se guzar gaya

rahe qaid-o-band ki lazzaten ki aziyyaten bhi hain rahaten

main qafas men aate hi sarhad-e-gham-e-ashiyan se guzar gaya

na ‘vaqar’ dair se vasta na haram se mujh ko koi gharaz

kisi be-nishan ki talash men main har ik nishan se guzar gaya