Ishaq Virdag
ra.egani ka ariza hai mujhe
zindagi ek hadisa hai mujhe
is ḳharabe se kab gila hai mujhe
apna hona hi mas.ala hai mujhe
zimni kirdar huun kahani ka
apni taqdir ka pata hai mujhe
mujh ko andar ki kuchh ḳhabar hi nahin
aur bahar ka sab pata hai mujhe
dasht men shahr yaad aata hai
ishq ka pahla tajraba hai mujhe
vaqt ka raaz janne se miyan
jaane ye kaun rokta hai mujhe
ek lamhe ko ruk ke sun le use
a zamin tujh se jo gila hai mujhe
meri hi aankh ke vasile se
ḳhvab andar se dekhta hai mujhe
kitne chehre uTha.e phirta huun
a.ina phir bhi janta hai mujhe
ik ḳhushi suud par mili thi kahin
us ka qarza utarna hai mujhe
yuun hi ḳhamosh main nahin baiTha
shor andar ka Tokta hai mujhe
Leave a Reply