raat lambi bhi hai aur tarik bhi shab-guzari ka saman karo dosto
jaane phir kab ye milna muqaddar men ho apni apni kahani kaho dosto
kis pari-chehra se pyaar tum ne kiya kaun se des ke shahzade ho tum
apni rudad-e-ulfat suna kar baham dastan koi tashkil do dosto
mujh ko ehsas hai tum bhi meri tarah jan-o-dil ku-e-ulfat men haar aa.e ho
ab ye baazi na.e sar se mumkin nahin apna anjam ḳhud soch lo dosto
sub.h hogi to zalim zamane ke gham tum pe abr-e-sitam ban ke chha ja.enge
fursat-e-bazm-e-shab se ghaḌi-do-ghaḌi baat aapas ki koi karo dosto
Dhal ga.i raat taare bikharne lage muntashir ho chale dhyan ke silsile
koi dam aur dil men farozan raho ek muddat ke ba.ad aa.e ho dosto
Leave a Reply