rat-bhar ḳhvab men jalna bhi ik bimari hai
ishq ki aag se bachne men samajhdari hai
vaqt milta hi nahin hai mujhe tanha.i se
jang ḳhud se hi miri aaj talak jaari hai
aa.ine ghar ke sabhi TuuT chuke hain kab ke
ru-ba-ru ḳhud se hi hona bhi mujhe bhari hai
meri ye baat tu maane ya na maane lekin
bin tire duniya men jiina bhi adakari hai
dard tanha.i taḌap ashk mohabbat yaari
‘mit’ in sab men hi us gham ki taraf-dari hai
Leave a Reply