Imam Bakhsh Nasikh
rat-bhar jo samne ankhon ke vo mah-para tha
ghairat-e-mahtab apna daman-e-nazzara tha
ban gae girdab sail-e-ashk jaae gard-bad
abr-e-tar ki tarah main jis dasht men avara tha
tu ne ankhen pher liin yaan kaam akhir ho gaya
tair-e-jan paeban-e-rishta-e-nazzara tha
shab tire partav se labrez-e-latafat tha chaman
har gul-e-shabbu se jaari nuur ka favvara tha
mujh ko dam lene ki bhi fursat na duniya men mili
roz-e-maulid shadiyana kuuch ka naqqara tha
khurrami hoti hai bedardon ko sair-e-bagh men
ham ne jis gul par nazar ki ik gul-e-sad-para tha
khvab men bhi yaar tak mumkin na tha dakhl-e-raqib
jin dinon apna khayal akhbar ka harkara tha
shab nazar ki main ne furqat men jo su-e-asman
azhdaha thi kahkashan aqrab har ik sayyara tha
ai ajal di tu ne bar-e-jism se aa kar najat
kab se meri piith par ye khaak ka pushtara tha
khauf sab jaata raha dil se azab-e-hijr ka
naqd-e-jan dena gunah-e-ishq ka kaffara tha
kahte hain maara gaya vo jurm-e-tegh-e-naz se
kucha-e-qatil men ‘nasikh’ naam jo bechara gaya
Leave a Reply