Poet
mushkil hai pata chalna qisson se mohabbat ka
andaza musibat men hota hai musibat ka
hai nazaa ke aalam men bimar mohabbat ka
mushkil hai sambhalna ab bigdi hui halat ka
afsos ki ham so kar jaage bhi to kab jaage
marne pe khula uqda jiine ki haqiqat ka
vo aae hain khud apne divane ko samjhane
ai jazba-e-dil dekha iqbal mohabbat ka
ai chashm-e-haqiqat-bin dil ki hai bisat itni
ik chhota sa tukda hai aina-e-hasrat ka
kyuun ishq ke jhagde ko le jaata hai uqba men
kar khatma duniya men duniya ki musibat ka
ai ‘qadr’ hasinon ko main dil se na kyuun chahun
jab husn-parasti bhi ik zauq hai fitrat ka
Leave a Reply